Wednesday, June 18, 2008

حدث فى مثل هذا اليوم





في مثل هذا اليوم ....من خمستاشر سنة و احنا لسة حدث فى مثل هذا اليوم من 15 سنه واحنا لسه طهقانين جداد كانت الحياة جميلة رغم انها كانت صعبة فاكر يا طهقان لما اتجوزنا في الشقة الصغيرة اللي في الدور الثامن و اللي كانت من غير اسانسير و كنا نشتري بجنيه لب و نقعد نقزقز على السلم لحد ما نوصل و نترمي على الكنبة من التعبو لا يوم الفرح لما اصريت انك تشيلني قلتلي حشيلك من السادس و على ما وصلنا الدور السادس جبت زيت
ولا فاكر الاوضة المثلثة اللي كانت محندقة و يادوب حاطين فيها كنبة نونو و اوضة النوم اللي اضطرينا نهد بلاكونتها علشان توسع شوية و تكفي الدولاب البلاكار، و لا المطبخ كان اتجاه واحد يا رايح يا جاي مينفعش اتنين يدخلوا سوا. و الحمام بقى كان فضيحة لا ممكن ابدا تدخل الا و تسيب الباب مفتوح و اي حد معدي يمسي عليك و انت تقوله: اتفضااااال ، بس تصدق كان حمام ونس و مسلي و كنا بنعرف نتفرج على التليفزيون الاربعتاشر بوصة و احنا بنعزف احلى السمفوكيات فاكرين نورا في فيلم( جري الوحوش) لما كانت بتقول : قطعت يا اختي كتر الاوض كنا ملمومين في اوضة واحدة دلوقت كل واحد مننا في اوضة و مبنكلمش بعض فعلا عندها حق




القصد يا اعزائي البلوجرز اننا بدانا حياتنا -قبل عصر اللاب توب- ببساطة شديدة كاي اتنين خريجين جداد معندهمش امكانيات... لأ... كان عندنا اشتراك ابونية في مترو الانفاق و كنت اركب انا عربية الستات و هو العربية اللي قبلي و نقعد نبص لبعض من الشباك اللي بين العربيتين قال يعني الشوق مقطع بعضه بقى لحد ما نوصلو كانت كل فسحنا تمشية و لا نجرؤ نفكر نتعشى و لا نتغدى بره طبعا ما هي عشوة برة يعني غذا عيش حاف خمس ست ايام أونروح بقى نتسحتج عند حماتي أو عند امي علشان نتغدى و نتحجج انهم وحشونا و اننا منقدرش نغيب عنهم و انت القلب الكبير و حاجات من دي


فاكر يا طهقان لما عييت مرةوفاكر يا طهقان لما عييت مرة و مكنش معانا فلوس نروح لدكتور و اضطرينا نبيع انسيالي الدهب علشان نشتري مضاد حيوي... لا استنى انا مش بسيحلك واللهي... انا بس بفتكر احلى ايام كنا بنميل فيها على بعض في ازمتنا و صدقني مفيش حد في الدنيا مامرش بفترات جفاف و امساك زي دي



طيب فاكر عم فرج بتاع الادوات الكهربائية اللي كنا بنشتري منه الحاجات بالقسط؟ كان راجل طيب انا فاكرة مرة اشترينا منه مضرب بيض تمنة حاجة و اربعين جنيه و كنا بندفع قسط 13 جنيه كل شهر. الغريبة اننا مستخدمناش مضرب البيض الا مرة او مرتين بس كان عندنا رغبة اننا نشتري كل كماليات البيت، و كنا بنفرح جدا لما نجيب حاجة جديدة زي السجادة اللي اشتريناها من اوكازيون النساجون الشرقيون.. فاكر! و لا الستارة البلاك اوت اللي جبناها من وكالة البلح بعد طول صبر و نوم في عز الشمس ما هو اصل لما هدينا البلاكونة عملنا شباك الوميتال و حطينا عليه ستارة عادية ماكنتش بتحجب ضوء الشمسفاكر يا طوطو لما انا دخلت اوضة النوم و قفلت الباب و معرفتش افتح الاوكرة الا لما رجعت انت من الشغل و فتحتلي من برة!! قعدنا وقتها نعيط و نضحك قال يعني اخدت افراج من الحبس الاحتياطي و انت جبت ابو الغيط و جيت تستقبلني
و لا لما كانت الكهربا تقطع كانت المية كمان تقطع و كنا بنعيش العصر الحجري في القرن العشرين فاكر لما كنت تقولي : كوزيه مواه سيلفوبليهعلشان اجيب لك كوز المية تتوضا هههههههو لما جاتلك الوظيفة اللي في الشركة الاستثمارية و اشترينا شقة جديدة و جينا نعزل... كنا بنودع الشقة بالدموع لانها رغم ايامنا الصعبة فيها الا انها كانت اجمل ايامفي عيد جوازنا يا طهقونتي بقولك الحب الحقيقي مواقف وتشابك مش كلام... بهديك احلى هدية ممكن حبيبة تهديها لحبيبها


تعبيرا عن مدى الدفا و الود اللي بيناربنا يخليك ليا و تفضل طهقان على طول

من مدونة طهقانه لبستوكة

17 comments:

صاحب المضيفة said...

جامدة بجد


لكن كئيبة من كتر الحاجت الضيقة اللي فيها

انا حسيت اني قاعد في قرافه مش في بيت

ههههههههههههه

لكن بجد تسلم ايد اللي كتبها

أسلوبها جميل وتلقائي


تحياتي

رحـــــال said...

اول مرة اعلق فيها على بوست فى المدونة هنا ..

بس بجد الله ينور تسلم الايادي ..

فكرتينا بالذي مضى ..

ههههههههه

رحــال

bastokka طهقانة said...

ربنا يسعدك زي ما اسعدتيني
ميرسي ليكي
و يا رب اشوفك صحفية كبيرة و تنشريلي في جرنالك

اوروفوار

عيله مفتريه سابقا said...

بجد تحفه

الله على دى ذكريات
الله على ده حب

اوعدنا يارب

لوحة الشرف حلوة قوى يا صحفية


سلامى

عروسة ننوسة said...

ايه بقى فين الجديد ....شكلك صحفيه كسلانه
وحشتينى

ريهام العربي said...

هههههههههههههههههه والله عسل

كلامك جامد رغم ان اللي كتبتيه عيشه

صعبه بس بدايه حياه ولدتي ووالدي

كانت كده مش كده قوي يعني بس كانت

احلي ايام لاني عشات جزئ منها

وعلي فكره انا بتمني اني ابدا من

الصفر مع جوزي بشرط انو يكون

ابن ناس ولما الحال يتحسن ميبصش برا

زي ما بنسمع الايام دي <_<

انت تسال والكمبيوتر يجيب said...

يها المواطنون نذيع عليكم بعد قليل خبرا هاما
مارشات عسكريه مارشات عسكريه مارشات عسكريه
كمان مارشات عسكريه
كفايه كده
ايها المواطنون جاءنا البيان الهام التالى
اذاعت كافة وكالات الأنباء الفضائيه والأرضيه وما تحت الأرض ايضا ان السيد عبده الرايق مرشح للفوز بجائزه تقدر بربع مليون يورو ....متتخدوش اوى كده لأن من شروط الجائزه ان يجيب على سؤال بمدونتنا التى تحوى هى وموقعنا كافة التفاصيل والكل مدعو للأشتراك والفوز باحدى جوائزنا الثيمه
ونرجوا ان تستمعوا الى حلقة برنامجنا الأذاعى الذى به ايضا معلومات مثيره فى هذا الموضوع يوم الأحد 29-6 حيث نكشف كافة الأسرار وراء هذا الموضوع والبرنامج يذاع التاسعه وعشر دقائق صباحا على اذاعة مصر الرئيسيه كما يمكن الأستماع اليه من داخل موقعنا على النت اسرة برنامج انت تسال والكمبيوتر يجيب
والعنواين
المدونه ثم الموقع كالتالى
http://netonradio.blogspot.com
http://dear.to/cairo

Unknown said...

هههههههه

على فكره مدونه لذيذه اوووى بجد
واكتر حاجه عجبتنى فيها هى التعريف بتاع حضرتك بنوته عقلها اكبر من سنها
انا على فكره برده كل الناس مش مصدقه انى عندى 14 سنه وبدون فى المدونه عادى يعنى انتى عارفه اهم حاجه الغقل لان ممكن يكون واحد عنده 30 سنه بس ميتساويش بواحد عنده 15 سنه من ناحيه العقل وبحييكى على اسلوبك الجميل ف الكتابه وتسلم ايدك بجد...

يشرفنى زيارتك على مدونتى المتواضعه حتعجبك ان شاء الله عليها طريقه ازاى نفتح اكثر من ايميل فى نفس الوقت من غير برامج خاااالص....

تحياتى لكى..

عمـــــــــــــر»-(¯`v´¯)»

Unknown said...

اهو انا جيت وعلقت ومردتيش على التعليق يبقا ليا حق بقا معلقش تانى...ولا ايه
ولا حتا شرفتينا ف المدونه بتاعتى على العموم انا حسيبك يومين كده لو ملقتش تعليق يبقا انتى اللى جنيتى على نفسك ههههههه

شفـقــة و إحســــان said...

اصوووووووووووووووووووووووووووووت.......ايه عايزة جديد لسه ما فيش؟؟

Anonymous said...

اه فعلاً دائماً ماما تقول بتكره الاوض الكتير عشان انا واخواتي كل واحد في ناحية

بس حلوة المدونة ياروشة انا اول مرة ازورها

بنوته said...

بوست جامد جدا مقدرتش الا ان انا اقراه كلمة كلمة روعه

كلام على بلاطة said...

ولوحة شرف لكل صحفى تروشن
تحياتى

القلب الطيب said...

بجد بجد فوق الروعة

لكن بجد انا حسيت انى قاعد فى ازازة حاجة ساقعة لاء دانا كنت قاعد فى غطه
الازازة من كتر الحجات الضيقه
هههههههههههههههههههههههههههه
لكن بجد والله الموضوع جامد اوى
تسلم ايديك بجد
وربنا يوفقيك

تحياتى القلب الطيب

Unknown said...

مرور للتهنئة بقدوم شهر رمضان وتمنياتى بان ننال منه الكثير ...لا تدع الفرصة تفوتك باغتنام هذا الشهر الذى فضله الله على باقى الشهور
ودعواتى لكم جميعا بقبول اعمالكم وعباداتكم وان نكون مع الرسول ان شاء الله ..سعيد بزيارتى ومرورى والى لقاء قريب لك كل التحية والتقدير

البت المشمشية حلوة بس شقية said...

انا افتكر لوحة شرف واحدة كانت فى المدرسة وكان اسمى مكتوب فيها
بصى اعملى لوحةشرف واعملى استفتاء عن المدونين الجدد الى عملو انقالب زى
ههههههههههههههه
وحطى اسمهم فى لوحة الشرف

almasry said...

ربنا يسعد طهقان وطهقانه