Wednesday, June 18, 2008

حدث فى مثل هذا اليوم





في مثل هذا اليوم ....من خمستاشر سنة و احنا لسة حدث فى مثل هذا اليوم من 15 سنه واحنا لسه طهقانين جداد كانت الحياة جميلة رغم انها كانت صعبة فاكر يا طهقان لما اتجوزنا في الشقة الصغيرة اللي في الدور الثامن و اللي كانت من غير اسانسير و كنا نشتري بجنيه لب و نقعد نقزقز على السلم لحد ما نوصل و نترمي على الكنبة من التعبو لا يوم الفرح لما اصريت انك تشيلني قلتلي حشيلك من السادس و على ما وصلنا الدور السادس جبت زيت
ولا فاكر الاوضة المثلثة اللي كانت محندقة و يادوب حاطين فيها كنبة نونو و اوضة النوم اللي اضطرينا نهد بلاكونتها علشان توسع شوية و تكفي الدولاب البلاكار، و لا المطبخ كان اتجاه واحد يا رايح يا جاي مينفعش اتنين يدخلوا سوا. و الحمام بقى كان فضيحة لا ممكن ابدا تدخل الا و تسيب الباب مفتوح و اي حد معدي يمسي عليك و انت تقوله: اتفضااااال ، بس تصدق كان حمام ونس و مسلي و كنا بنعرف نتفرج على التليفزيون الاربعتاشر بوصة و احنا بنعزف احلى السمفوكيات فاكرين نورا في فيلم( جري الوحوش) لما كانت بتقول : قطعت يا اختي كتر الاوض كنا ملمومين في اوضة واحدة دلوقت كل واحد مننا في اوضة و مبنكلمش بعض فعلا عندها حق




القصد يا اعزائي البلوجرز اننا بدانا حياتنا -قبل عصر اللاب توب- ببساطة شديدة كاي اتنين خريجين جداد معندهمش امكانيات... لأ... كان عندنا اشتراك ابونية في مترو الانفاق و كنت اركب انا عربية الستات و هو العربية اللي قبلي و نقعد نبص لبعض من الشباك اللي بين العربيتين قال يعني الشوق مقطع بعضه بقى لحد ما نوصلو كانت كل فسحنا تمشية و لا نجرؤ نفكر نتعشى و لا نتغدى بره طبعا ما هي عشوة برة يعني غذا عيش حاف خمس ست ايام أونروح بقى نتسحتج عند حماتي أو عند امي علشان نتغدى و نتحجج انهم وحشونا و اننا منقدرش نغيب عنهم و انت القلب الكبير و حاجات من دي


فاكر يا طهقان لما عييت مرةوفاكر يا طهقان لما عييت مرة و مكنش معانا فلوس نروح لدكتور و اضطرينا نبيع انسيالي الدهب علشان نشتري مضاد حيوي... لا استنى انا مش بسيحلك واللهي... انا بس بفتكر احلى ايام كنا بنميل فيها على بعض في ازمتنا و صدقني مفيش حد في الدنيا مامرش بفترات جفاف و امساك زي دي



طيب فاكر عم فرج بتاع الادوات الكهربائية اللي كنا بنشتري منه الحاجات بالقسط؟ كان راجل طيب انا فاكرة مرة اشترينا منه مضرب بيض تمنة حاجة و اربعين جنيه و كنا بندفع قسط 13 جنيه كل شهر. الغريبة اننا مستخدمناش مضرب البيض الا مرة او مرتين بس كان عندنا رغبة اننا نشتري كل كماليات البيت، و كنا بنفرح جدا لما نجيب حاجة جديدة زي السجادة اللي اشتريناها من اوكازيون النساجون الشرقيون.. فاكر! و لا الستارة البلاك اوت اللي جبناها من وكالة البلح بعد طول صبر و نوم في عز الشمس ما هو اصل لما هدينا البلاكونة عملنا شباك الوميتال و حطينا عليه ستارة عادية ماكنتش بتحجب ضوء الشمسفاكر يا طوطو لما انا دخلت اوضة النوم و قفلت الباب و معرفتش افتح الاوكرة الا لما رجعت انت من الشغل و فتحتلي من برة!! قعدنا وقتها نعيط و نضحك قال يعني اخدت افراج من الحبس الاحتياطي و انت جبت ابو الغيط و جيت تستقبلني
و لا لما كانت الكهربا تقطع كانت المية كمان تقطع و كنا بنعيش العصر الحجري في القرن العشرين فاكر لما كنت تقولي : كوزيه مواه سيلفوبليهعلشان اجيب لك كوز المية تتوضا هههههههو لما جاتلك الوظيفة اللي في الشركة الاستثمارية و اشترينا شقة جديدة و جينا نعزل... كنا بنودع الشقة بالدموع لانها رغم ايامنا الصعبة فيها الا انها كانت اجمل ايامفي عيد جوازنا يا طهقونتي بقولك الحب الحقيقي مواقف وتشابك مش كلام... بهديك احلى هدية ممكن حبيبة تهديها لحبيبها


تعبيرا عن مدى الدفا و الود اللي بيناربنا يخليك ليا و تفضل طهقان على طول

من مدونة طهقانه لبستوكة

Saturday, May 3, 2008

الشعبvs الحكومة من استادالبلوجرز الدولى



العواف عليكم ..


نحييكم .. ونقدم لكم .. المباراه النهائيه لكاس مصر


مباشرة م استاد البلوجز الدولى .. معكم الكابتن سمسمه فروه


مباراه تنبأ ستادنا البزرميطى بانها ستكون حامية الوطيس


الحكومه vs الشعب


زى مااحنا شايفين قدامنا المنتخب الحكومى


بالفنلات البيضا والجزم الاديداس السيلفرمنوريين ف ارض الملعب


ايه ده .. ايه ده .. شايفين اللى انا شايفاه ياجماعه


وانتو تشوفوا ليه اصلا .. اما شعب ابن طماعه ميملاش عينه غير التراب


زى ماانا شايفه .. ان وزير الاعلام مش موجود ف الملعب


و ع دكة الاحتياطى وزير الاسكان .. وزير الاستثمار .. وزير البيئه والبتاع ..


ونزل الملعب فريق الشعب بفنلاتهم السودا وكوتشيات باتا (( متانه وخياطه))


وزى مااحنا عارفين ياجماعه ان باتا شىء يفخر بيه كل مصرى ..


زى مااحنا عارفين ان باتا ابتدت سنة


ايوه وزى مااحنا شايفين الحكام نزلت الملعب .. كابتن شلضم ابو دومه ..


وحاملى الشومه الكابتن مصطفى سنجه والكابتن عبده دهشور ..


ومع انطلاق صافرة كابتن شلضم .. ابتدت المباراه


خرج كابتنا شلضم ربع جنيه مخروم .. اختارت الحكومه الوش


وبرده اخدت الضهر .. الحكومه تاخد كل حاجه ياغجررررر


حدف الحكم الربع جنيه .. منزلش الربع جنيه .. اشار الحكم ان الكوره مع الحكومه


ابتدت المباراه .. الجماهير تتعالى هتفاته مصر مصر تحيا مصر .. مصر يااما ياثفينه


الكوره مع السيد الفاضل الوزير على مصيلحى .. ترقيصه .. يباصى لوزير الصحه


ترجع للدكتور على مصيلحى .. وجوووووووووووون م برا ال 19 .. الله عليك الله عليك




الكوره دلوقت مع الشعب .. تتقدم نقابة المعلمين .. يراوغها وزير التعليم


ولكن ياووووووووولد جووووووووون .. هو ده المدرس المصرى النيل رواه والخير جواه




الكوره دلوقت مع السيد الوزير حاتم الجبلى .. شنكله وكعبله ف وسط الملعب


صفاره وشاره .. ركنيه ع الشعب .. يلعب الركنيه السيد وزيرالسياحه


تسقيطه وجوووووووون .. الجون التانى للحكومه احرزته السيده عائشه عبد الهادى




الكوره مع الشعب .. والنتيجه 2/1 والجماهير عليت بالهتافات ياجماعه


تسقيطه لنص الملعب .. توصل لنقابة الصيادله .. تشابك شديد و يسحبها منهم وزير الصحه




كوره عرضيه رائعه .. تخلصها الضرائب العقاريه بنجاح ..




ون تو لنقابة الاطباء .. ولا ارووووع .. ياجماعه الناس دى مش نازله تهزر




اىىى شنكله .. نقابة الاطباء ع الارض ..ايه ده لا فيه كارت ولا شاره ولا صفاره ولا حاجهماعلينا ..


ياجماعه الكوره اجوان .. الاسعاف دخل وشال نقابة الاطباءان شاء الله خير ياجماعه


ايه اللى انا شيفاه ده ..


مدرب الحكومه بيسخن ونزل الملعب


مش ممكن ياجماعه المباراه دى هتدخل التاريخ ..


الكوره دلوقت مع مدرب الفريق .. باكتساح


عابر المستطيل الاخضر كامل .. يطويه كمن يطوى قميصه بعدما كواهايه ده ..


محدش قادر يسلك الكوره ياجماعه .. ايه اللى بيحصل دهايه اللى انا شيفاه ده


جووووووووووووووووووووووووووووووووووووووووووووون


رائعه للسيد الدكتور قائد الفريق احمد نظيف


(( ليس م حق اى موظف حكومى ان يضرب عن عمله .. عايز تعترضاعترض براحتك محدش قالك متعترضش .. مارس عملك عادىبس علق شاره سودا ع كتفك حدادا ع مطالبك اللى ابقى قابلنى لو طولتهابعد متخلص ساعات عملك الطبيعيه خد زمايلك اللى عايزين يضربوا معاكواطلعوا هاتوا شمسيتين وكرسيين واقعدوا ساعه اعتراض قدام محل عملكمقانون العمل بيقول ان مش م حق اى موظف انه يضرب .. فاهمين .. ولا ليلتكم هترسى ع ايهيعنى انتم موظفين حكومه محترمين لابسين جزم باتا محصلتش .. تيشرتات سودا ماركة اتقمع واتلمعمش عاجبيكم .. شايفين اى عامل ف شركه او مصنع خاص بيضرب .. لا طبعااااااااااااااالانهم ناس اخلاقهم عاليه بغض النظر عن انهم واخدين حقوقهم وع قد مبيشتغلوا بياخدوا ..لكن كفايه انك موظف حكومى بتخدم بلدك .. يعنى انت لو بتحب بلدك تشتغل ببلاشدى مصر انتو فاهمين مصرررررر ))


واخيرا اطلق الحكم صافرة نهاية المباره ..ويبقى الوضع كما هو عليه


.... هذه الخربوشه ليست للسخريه م احد ..حاشا لله


.. ولكن تعبيرا عن مواقف واراء مضاده ف اطار ترفيهى ....


اكن لجميع م ذكرتهم المزيد م الاحترام ....


تمنياتى للفريقين بالنجاح والفوز بالكاس مناصفه.. حتى نحيا ف سلام .


.كان معكم زى مقلتلكم ف الاول مش فيلم هو


كابتن سمسمه فروه


تششششششششششششش ااقفلى التلفزيون يافوزيه

..قفلته يااخويا .. كورة ايه وهم ايه .. صحتك بالدنيا

نقلا عن مدونة اجدع بنوته لسمسمه..

Friday, April 25, 2008

عاش الملك


وقالت ام وحيد ..لزوجها فريد ..بعدما اتى من الصعيد ..بلغنى ايها الزوج الرشيد ..صاحب العمر المديد ..والكف الحديد ...انه فى قديم الزمان ..كان يحكم وردستان ...ملك اسمه فيحانوذات صباح جميل ...ونسيم عليل ..نادى الملك على عبد الجليل
ايه ده يا جلجل ؟؟ فى ايه ؟؟ الناس حوالين القصر بالعبيطه وبالهبولى كده ليه ؟؟؟؟
وانا عارف يا ابهه ....كلهم قال ايه جايين يشتكوا من الوزير قحطان
كلهم جايين يشتكوا مره واحده؟؟؟ ...هو مين يابا فايق لكل الخلق دول ؟؟؟...وبعدين انا عندى جلسه مساج بعد دراع ونص ..هو الوقت كام دلوقتى ؟؟؟
دلوقتى الوقت سته دراع وربع
طيب انا جلستى معادها سبعه دراع ونص ...يعنى فاضل لى دراع وربع ...وبعدين هنعمل ايه مع البشر دول ؟؟؟ هنفلسعهم من هنا ازاى ؟؟؟
سيبنى انا اتصرف يا ابهه ...ولد يا هيثم نادى تامر وتعالوا...وهاتوا معاكم مكبر الصوت ...هاتوا الصفيحه الجديده اللى لسه شارينها امبارح من الصين
هتعمل ايه يا عبد الجليل ؟؟؟؟؟؟؟؟؟
ولا حاجه يا ابهه ..انا هاطلع على كتف الولد تامر وهيثم واقولهم خبر يليهيهم عن الثوره اللى عاملينها دى ..بس اقولهم ايه ؟ اقولهم ايه ؟اقولهم ايه ؟
ايه يا جلجل انت ضيعت دلوقتى ربع دراع وانت عماله تفكر...انت كده هتضيع عليا جلسه المساج ..والملك بتاع فل ستان لو عرف ان فى جلسه مساج ضاعت عليا هيفرح فيا ويغظنى ومراته هتغيظ مراتى
بس لقيتها ...خلاص ..تعالى يا هيثم انت وتامر ...شيلونى وسوقوا على البلاكونه

وبعد نص دراع عاد عبد الجليل ..بعدما فعل المستحيل ..واشتغل شغله التقيل وقابله الملك وهو مشغول ..وقام سأله على طول
ايه يا جلجل عملت ايه ؟؟؟
تعالى يا ابهه جنب البلاكونه وانت تعرف
ايه ده الناس عماله تهتف وتقول ...عاش الملك فيحان وعاش الوزير قحطان..عاش الملك فيحان وعاش الوزير قحطان ...انت قولت لهم ايه يا جلجل ؟؟؟
ايه يا ابهه ..انت عارف اخوك جلجل يفوت فى الحديد ..قولت لهم ان ملك فل ستان عمل حركه قرعه من شغل العيال الملوك الصغيره وهجم على حدودنا فى الليل لكن الوزير قحطان والحرس قاوموهم وقتلوهم والوزير قحطان اتصاب فى رجله وهو بيدافع عن تراب المملكه والشعب نايم فى بيته وبياكل رز ولبن مع الملايكه ..واديك شايف وسامع الكل بيهتف ليك ..وللوزير قحطان
طيب فين الوزير قحطان ..احسن يجى دلوقتى والناس تعرف اننا بنقرع عليهم ..ويبقى منظرنا فس فس خااااااااالص
قحطان مين يا ابهه اللى يجى ؟..قحطان نايم فى العسل تحت التربيزه اهو....طول الليل كان عماله يضرب بانجو لما اتعمى ونام على نفسه تحت التربيزه

خلاص صحييه وخليه يلف رجله وفهمه القصه علشان الناس لو سألوه يعرف يرد عليهم
هو فى حد بيسأل يا ابهه ؟..خلاص يا ابهه الوقت دلوقتى سبعه ونص دراع معاد المساج
ماااااااااء.....مااااااااااء ....ماااااااااااءوهنا ادركت ام وحيد ان المعزه جعانه ...وان الميه خلصانه فلبست القبقاب وخرجت من الباب

********************************

طبعا فهمتو فرنسا قصدها ايه

*********************************

نقلا عن مدونة فرنسا هانم لفرنسا

Wednesday, April 23, 2008

فاصل اعلانى ونعوووووووووووووووود


حزب الأحلام الديموقراطى
ديموقراطية - نوم-سياسة- عراقة -صدارة - كل إللى نفسك فيه عندنا هتلاقيه
حزب الأحلام الديموقراطى
حزب لن تجد له مثيل ,...حزب يحل المشاكل بلا أى خسائر
حزب الأحلام الديموقراطى
به كل المقومات الحزبية التى لا يعلمها أحد إلا الله
حزب الأحلام الديموقراطى
أحلم وأتهنى ونام وأتغطى كويس عشان الكوابيس
حزب الأحلام الديموقراطى
رئيسته نائمه وبتاخد تعسيلة بين النوم
رئيسة حزب الاحلام امرأة فوق العادة إنها دائما وراء المشاكل تحلها وهى نائمة بكل ضمير
حزب الأحلام الديمقراطى
أعضائه ينامون .... يحلمون ويأكلون رز بلبن مع الملايكة ... وعندهم مقدرة جباررة لحل كل المشاكل المستعصية
وشعارنا ناس كتير نايمة على الارض
حزب الاحلام الديموقراطى
يتمتع بالشفافية يعنى احنا حاطين إزاز فاميه شفاف يخلى إللى برة يشوف إللى جوه
والصلاه على الزين ...والصلاه على الزين ...هات لنا منه باكو واتنين
بوووووووووووووووووووم
حزب الأحلام الديموقراطى
معانا هاتقدر تغمض عينيك

*******************************

اكيد طبعا فاهمين هى بتتكلم على حزب ايه

من غير كلام

اكيد حزب الاحلام الديموقراطى!!!!هههههههههه

************************************

نقلا عن مدونة استرها يارب لرئيسه حزب الاحلام الديموقراطى سلوى سمير

Monday, April 21, 2008

ما بعد حياتى



انا منزلة البوست ده علشان تفكروا شوية فى الاخرة وده اتبعتلى فى رسالة على الفيس بوك:


قمت من النوم فجأة• وجدت في عيني نور غريب وقوي •

أستغربت النور ده كله جي منين• واندهشت لما لقيت الساعه بتشاور على 3 صباحا• وأن مصباح الأوده مطفي• طيب النور ده كله جي منين

وانفزعت لما لقيت نص ايدي جو الحيطه• شديتها بسرعه• خرجت• وانا ببصلها بكل اندهاش• رجعتها تانى لقيتها دخلت جوه الحيطه• استغربت ايه اللى بيحصلي ده

وسمعت صوت ضحك• بصيت نحيته• لقيت اخويا نايم جمبي• ولقيته بيحلم• بيحلم انه راكب عربيه اخر موديل• وانه رايح حفلة كبيره قوي• لناس اغنيه قوي• وانه لابس اغلى واشيك لبس• عشان يكون احلى واحد في الحفلة• وكان بيضحك وفرحان•

ابتسمت• بعدين اتفزعت من اللى بيحصل• وقمت من على السرير• وجريت على اودة امي وابي• قعدت اصحى• فى امي واطبطب عليها• وانديها بس هى مش بتستجيب

قعدت انديها كتير واطبطب كتير• ولقيتها فجأه قامت• كانت مخضوضه قوي• وبتبص يمين وشمال• قولتلها يا ماما انت مش شيفانى• لقيتها مش بترد• ولا بتبصلي• قعدت انادى• ماما......ماما• كانت حاطة ايدها على قلبها• وبتقول بسم الله الرحمن الرحيم•

ولقيتها بطبطب على بابا وبتصحيه• وقام• قالت له قوم نطمن على الاولاد• ده وقته• قالتله معلش قلبي مش مطمن• في حاجه غريبه•

وانا واقف مستغرب• قعدت اقولها يا ماما• انا اهو يا ماما• انت مش شيفانى• ياماما

قامت ومشيت• حاولت امسك هدومها لكن الهدوم مش بتتمسك• جريت وقفت قدمها عدت من جوايا• ملقتش غير انى امشي وراها• وبابا كان وريا• محاولتش ابصله• عشان ما يتجاهلنيش برده• دخلت امى الاوده وفتحت النور• >مكنش عندى فرق لأن الدنيا كانت منورة اصل•


انفزعت لما لقيتنى نايم على السرير• وقعدت ابص لجسمى وايدى وانا مستغرب• انا ازاي بقيت اتنين• انا مين ومين اللى نايم على السرير ده ان مكنش انا• وقطع استغرابي•

جملة بابا استريحتى يا ستى اهم نايمين اهو• لكن هي قالتله معلش انا عاوزه أطمن على محمد• ولقيتهى بتقرب مني قصدى من الشخص اللى نايم مكانى•

وبتطبطب عليه كانت بتقوله يامحمد لكن هو مش بيرد وكانت• بتطبطة بشويش وبدأت تهزه جامد• جريت عليها وقلتلها يا ماما انا اهو• رودي عليا• لكن صوتها كان بيزيد خوف وكان بيعلى• كانت بتنادي• محمد.....محمد• وفجأة صرخت ولقيت الصرخة بتوجعنى قوي•

كانها بتضربنى• بكيت• وقلتلها ما تصرخيش

وهى بتقول محمد• وبابا جري علي وحط ايده على وشى وصرخ وبكى• وحسيت بالوجع تانى• محمد مش بيرد والبكاء بيزيد وانا مش عارف اعمل ايه•

صحي اخويا على الصوت وهو بيسال في ايه• ماما صرخت اخوك مات يا احمد مات وانا بقولها ببكائي لأ• والله• ياماما انا هو شوفيني شوفينى انت مش سمعاني•

لكن ما فيش امل• بصيت للسما وقلت يارب ايه اللى بيحصل ده•

لكن ما لقتش سقف• وشفت ناس ولما شوفتهم مشيوا وحسيت بطعنه غريبه• وحجات بتقطعنى بصيت لأحمد لقيته بيصرخ• قلتله اسكت انت بتعذبني• لكنه كان بيزيد فى الصراخ

وماما بتبكي فى حضن بابا• والنحيب بيزيد وقفت قدمهم عاجز• ومزهول رفعت راسي تانى وقلت يارب• ايه اللى بيحصل يارب فى ايه وسمعت صوت من كل حته•

كان جي من بعيد ركزت معاه لقيته بيعلا وبيزيد كأنه قرآن• أيوا قرآن والصوت بدأ يقوى يقوى قوي هزنى من شدته كان• بيقول

• لَقَدْ كُنتَ فِي غَفْلَةٍ مِّنْ هَذَا فَكَشَفْنَا عَنكَ غِطَاءكَ• فَبَصَرُكَ الْيَوْمَ حَدِيدٌ

زهول الصوت• لقيت ايدين بتطبق عليا اتنين شكلهم مش من البشر بيقوليلى تعالى• م انتم مين وعاوزين منى ايه شدونى• صرخت سيبونى• ما تخدونيش من اهلى اهلى فكرنى مت قالولى ما انت مت فعلا•

قلتلهم ازاي ما انا شايف اهو وبتكلم وحاسس بكل حاجه> ابتسموا• وقالوا• عجيب امركم يا بشر كلكم فاكرين ان الموت نهايه الحياة• وما تعرفوش ان حياتكم موت وحلم طويل هتصحو منه على اليوم ده•

على العالم ده سألتهم انا فين وانتو واخدنى على فين قالولي• احنا حراسك لحد القبر اتفزعت قبر ايه انتوا هتدخلونى القبر•

ردو كل انسان لازم يدخل القبر• بس انا عمرى ما دخلت القبر ده مكتوب على كل البشر•

طول عمرى كنت بكره الكلمه دي• مبحبش اسمعها بستعيذ بالله منها بحاول انسها• مكنتش بقدر اتخيل نفسي فى المكان الصعب ده

• سألتهم بخوفي هتسيبونى قالولي مع عملك طيب وعملى ده• كويس سكتم

ولقيت واحد بيصرخ وبيبكي وواحد تانى سعيد قوي• وكل واحد فيهم واقف معاه اتنين بردة زى اللى معايا سألتهم ده• بيبكى ليه•

قالوا ده عارف مصيره• طول عمرة كان من اهل الضلال قلت يعنى رايح النار•

واللي بيضحك ده رايح الجنه طيب انا رايح على فين قولولي

ردو عليا هما كانو عارفين هما ايه فى الدنيا ودلوقتى• عارفين هما فين فى الاخره وانت عشت طول عمرك تايه متردد• شويه تمشي صح وشويه تمشي غلط• شويه تتوب وترجع تعصي تاني ما كنتش واضح•

هتفضل بردة انهاردة تايه مش عارف حاجه اتفزعت وقلت• ايه يعنى ايه انا رايح النار• قالولى رحمة ربنا واسعه ولسة الرحلة طويلة

بصيت وريا لقيت عمي وابويا واخويا ماشين وراهم امي واهلي• بيبكوا• شايلين صندوق جريت عليهم ناديت محدش بيرد•

ناديت على امى قلتلها يا امى ما تبكيش ادعيلى ناديت على• بابا قلته يا بابا• خلى بالك من امى واخويا ناديت على احمد•

قلتله يا احمد خلى بالك من نفسك سيبك من الدنيا ومتاعها دي• رخيصة قوي

صدقنى مش هتنفعك ناديتهم كلهم بس كانو مشغولين بالبكاء• ومحدش سامعنى• مكنتش بتمنى حاجه فى اللحظة دي•

الا انهم يسمعونى وشدنى الملكين ونزلونى القبر• ونيمونى فوق الجسد عشان اشوف ابويا وهو بيرمى التراب عليا• بنفسه•

علشان اشوفهم وهما بيودعونى وخوفى عليهم انهم مش حاسين• باللى انا حاسه• وحسدى ليهم انهم لسة فى الدنيا بس للأسف•

كنت ببكى وهما بيبكوا كنت خايف عليهم من الدنيا قوى• واتمنى لو اصرخ ولو يسمعونى

وخرجم كلهم وقفلوا الباب والنور تحول سواد• لا اله الاالله محمد رسول الله

نقلا عن مدونه الحياه بكل ما فيها لنونى

Saturday, April 19, 2008

انا الكبير واحكمو انتو


بصوا انا فكرت كتير وقليل قبل ما اقولكم الى هقوله ده بس بجد الحق معايا واحكموا انتوا
بنفسكم الاول هقولكم مقدمه جدى -من امى - الله يرحمه زمان لما كان بيجى لينا كنت
تشوف ازاى امى بتعامله..

اولا كانت بتبوس ايديه ..وتقعد ترحب بيه جامد.. وعايز تاكل ايه يابابا , ونعملك ايه , وروح يا محمود هات كذا عشان جدك , واسكت يا واد واستكى يا
بت عشان مضايقوش جدكم ...

ولما تحس انه تعبان تقوله متدخل يا بابا تنام فى اوضه النوم ...وتفرش السرير باحسن

فرش ..وتجيب له احسن بطانيه ..وحظر تجوال فى البيت


كله وكردون ودام اوضه النوم- من غير امن مركز- عشان خاطر جدو ينام ماشى انا مش معترض امى كانت بتقول عشان جدو كبير وبيتعب من اقل حاجه ومش عايزين


نضايقوا ,... الولاد الحلوين يعملوا ايه لما جدو يبقى هنا؟؟!!وانا زى العبيط اقول يبقوا
مؤدبيناوك مفيش مشكله حقه جدو بقى كان يتكلم مع ماما يسألها عن سعر اى حاجه تقوله
بكذا...

يقولها دا انتوا ايامكو سوده يا بنتنى دا البتاع ده كان زمان

بكذاطن الحديد مش عارف
كان ب400 جنيه واللحمه كانت بتتباع بالرطل والرطل كان بقرش ولا حاجه زى كدههنا
بقى نقف واقفه - مش زى بتاعه عوكل - لا وقفه بجد بصو بقى وركزوا اوى جدو توفى-
وهو كام و 70 سنه -

كان طن الحديد بكام كان 1300 جنيه- دا يجى من سبع سنين
يعنى من 400 ل 1300 تقريبا الحديد زاد فى عمر جدى الى ه حاجه و70 سنه زاد تلات
اضعافه ----------- نسمى دى واحدانا شفت الحديد لما كان 1300 ودلوقتى بقى
بكام 5800 يبقى زاد كام مره هنقول اربعه اضعاف ؟؟؟

يبقى انا عندى كام سنه؟؟ طرفين
فى وسطين يا اخونا يقولك انا عندى على الاقل كام وتسعين سنه يعنى لازم امى تحترمنى اكتر من جدى.. انا مش واخد حقى يا جماعه.. ولا حد فيكم..

احنا لازم نطالب اهلينا
بحقنا .. احنا مش هفيه.. فى استهبال بيحصلوانا جبت لكم سلعه واحده لو جبت لكم باقى
الكشف هطلع جدى مات وهو عنده 4 سنين وانا عندى 1400 سنه هطلع اكبر من احمس
نفسه انا بقى مسكتش ...لا !! ..

انا صرخت وقلت عايز حقى مليش دعوه انا اطالب بالمساوه اشمعنى جدى - الى هو اصغر منى اصلا - يتعامل حلو وانا لألقيت امى قالتلى لا


يا فالح انت عشت فى عهد كم رئيس ؟؟ قلتلها واحدقالتلى جدك عاش فى عهد تلاته يبقى
جدك اكبرهى قالت كده وانا بصراحه حسيت انى اتكبست وخصوصا انى متوقع ان جيلنا
مش مكتوب له يشوف حد تانى هنعيش ونموت فى ظل نفس ال... المهم


بس بعد تفكير عميق
قلتلها بس استنى انا اعرف واحد فى امريكا عنده عشرين سنه وشاف تلات رؤساء يعنى
جدى مات عندهعشرين سنه يعنى انا اكبر منه بسنه وبعدين انا وجدى عشنا فى عهد رئيس
واحد فى ليبا يعنى

هو شاف لليبيا رئيس واحد ومات وانا شفت رئيس واحد برضه لحد ما
اموتانا مليش دعوه الى هيقرب للباب وانا نايم هولع فيهانا اكبر من جدى والاثبات موجود
وهخده ناس متجيش بالذوق

اهتفوا معايا بطوط اكبر من جده بطوط عايز حقه بطوط اكبر من
جده ايها المدونين والمدونات

اذا مات بطوط فكلم بطوط وصيه ليكم طالبوا بحقكم وربنا
يعينكم (طخ
...)
نقلا عن مدونه
بطوط حبوب

Wednesday, April 16, 2008

نام يا مصرى


نام يا مصرى مصر مش عايزة تناديك

ياللى فقر الدنيا أصبح لك شريك

ياللى كان دائك وفائك والكرامة وكبريائك الحشيش والبانجو ساقك
كبريائك مات خلاص البركة فيك

نام يا مصرى مصر مش عايزة تناديك

ياللى دايما كنت رافع بالسلاح أيدك لفوق

بالبنادق والمدافع خليت العالم يفوق

النهاردة سهل جدا تحكمك حتة حشيش

الشيوخ فوق مالطة تدن والشباب مابيختشيش

رقصة بلدى ورقصة تانجومرة خمرة ومرة بانجوواللى م الدوامة ينجو يربى دقنه ويعاديك

نام يا مصرى مصر مش عايزة تناديك

فصلوا دستور مقاسهم يلبسوه بس الكبار

وأنت تحت نعال مداسهم قلت أه زى الحمارقلت أه ولا حد همك مين يدوس فوق وش مين

هما يقروا الفاتحة وأنت كل حرف تقول أمين

أنت عارف بس صام

تحتى بطنك لما صامت كان حزامك فوقها قامط للزراير يشتكيك

نام يا مصرى مصر مش عايزة تناديك

مين بيفهم فى السياسة؟لا الافندى ولا المدام المهم الماتش إمتى؟والنتيجة كام لكام؟

والعشا فين النهاردة وفى المسلسل عملوا إيه ولعيب الكورة الفلانى ساب ناديه فى الدورى ليه؟

كله بيهلوس وهايصوإنت يا أبن المصرى لايص

جوه مسرح العرايس والخيوط رابطة فى إيديك

نام يا مصرى مصر مش عايزة تناديك

كنت لما تقول معارض ألف واحد كان يخاف

بعت صوتك فى المعارض وأستغطيت باللحاف

قول نعم.حط العلامة .وأوعى تقرا فى يوم كتابهما عايزينك نعامة دافنة راسها فى التراب

والطاووس جنبك يخطى بصمجى.ويقول داخطى وإنت لما رضيت توطى شوف بقى اللى ح يجرا فيك

نام يا مصرى مصر مش عايزة تناديك
ياللى عايش ع الحضارة وكام هرم على معبدين

يا ابنى دول حبة حجارة إنت فين والناس دى فينإنت جدك يعنى خوفو و الا خالك أخناتوندا

انت مابتعرفش تعمل حتى سوستة بنطلونروح ل(ينى)إملا الإزازة والحياة أخر لزازة دا

انت يا ابنى مالكش عازة زى فرخة ناقصها ديك

نام يا مصرى مصر مش عايزة تناديك

ويقولولك مصر أكتر حد راعى للسلام

وإحنا زى حمار فى كارو عربجيها العم سام

اللى بيفكر يخالفه أو يقوله حتى ليه؟تبقى ليلة أمه كحلى والمعونة تضيع يا بيه
إمشى تحت أوامره بس مرة (شى)أو مرة(هس)وإن طلعلك مرة حس يبدأ التفتيش عليك

نام يا مصرى مصر مش عايزة تناديك

شفت واحد مرة قالى يا ابنى ماتبطل عويل

انت ناسى نجيب بتاعنا والنوبل وأحمد زويل

قلتله الأول أخدها بقصة ساء فيها لديانته

وعمك أحمد إيه عملك لما جاب للثانية فمتووالنبى إتخيب بخيبتك

ياللى مش عارف نصيبتك

دا انت من صغرك لشيبتك لقمتك دى خسارة فيك

نام يا مصرى مصر مش عايزة تناديك

والنبى انا باكتب قصيدتى ودمعة نازلة من عيونى

أصلى مصرى وكل خيبتى إن أهلى علمونى إنى لو شفت الحقيقة فى مرة وأسكت أبقى شوشو
وإن قدرك لو يجيلك قولى مين عنك يحوشو
ياللى مستغرب لحالى قوللى بالله يا ابن خالى لما سيد يبقى سالى طب منين الخير يجيك
نام يا مصرى مصر مش عايزة تناديك

نقلا عن مدونة واحد من البلد دى